अयोध्येतील रामलल्ला प्राणप्रतिष्ठा वर्षपूर्तीनिमित्त नाशिक शिवसेनेतर्फे भव्य आरतीचे आयोजन

 अयोध्येतील रामलल्ला प्राणप्रतिष्ठा वर्षपूर्तीनिमित्त नाशिक शिवसेनेतर्फे भव्य आरतीचे आयोजन

शिवसेनेच्या बैठकीत कार्यक्रमाबाबत पदाधिकाऱ्यांना माहिती देताना शिवसेना उपनेते विजय करंजकर

नाशिक: अयोध्या येथील रामलल्ला मंदिराच्या प्राणप्रतिष्ठापनेच्या वर्षपूर्तीनिमित्त नाशिक शिवसेनेच्या वतीने विशेष कार्यक्रमाचे आयोजन करण्यात आले आहे. बुधवार दिनांक २२ जानेवारी रोजी संध्याकाळी ५.३० वाजता रामकुंड, नाशिक येथे प्रभू श्रीरामाची आरती आणि गंगा-गोदावरीची महाआरती होणार आहे.

नाशिक शिवसेना मध्यवर्ती कार्यालयात झालेल्या पदाधिकाऱ्यांच्या बैठकीत शिवसेना उपनेते विजय करंजकर यांनी या कार्यक्रमाची माहिती दिली. या कार्यक्रमासाठी नाशिक जिल्ह्यातून मोठ्या संख्येने रामभक्त आणि शिवसैनिक उपस्थित राहणार असल्याचे त्यांनी सांगितले.

याशिवाय, शिवसेना पक्षाच्या वतीने २३ ते २७ जानेवारी दरम्यान 'भगवा पंधरवडा'चे आयोजन करण्यात आले आहे. या पंधरवड्यात हिंदुहृदयसम्राट बाळासाहेब ठाकरे यांची जयंती (२३ जानेवारी) आणि धर्मवीर आनंद दिघे यांची जयंती (२७ जानेवारी) साजरी केली जाणार आहे. या निमित्ताने रक्तदान शिबिर, आरोग्य शिबिर, शालेय विद्यार्थ्यांसाठी शैक्षणिक साहित्य वाटप आणि महिलांसाठी हळदी-कुंकू कार्यक्रमाचे आयोजन करण्यात आले आहे.

बैठकीला शिवसेनेचे जिल्हाप्रमुख अजय बोरस्ते, सहसंपर्क प्रमुख चंद्रकांत लवटे, महानगर प्रमुख प्रविण तिदमे यांच्यासह शिवसेना, युवासेना, महिला आघाडी आणि विविध अंगीकृत संघटनांचे पदाधिकारी मोठ्या संख्येने उपस्थित होते.

लाखोंच्या स्वागत कमानीच्या चोरीचा प्रयत्न हाणून पडला

 लाखोंच्या स्वागत कमानीच्या चोरीचा प्रयत्न हाणून पडला

शिवसेना महानगरप्रमुख प्रविण (बंटी) तिदमे यांची सतर्कता; लेखानगर येथे घटना

नाशिक: जुने सिडकोतील लेखानगर येथे नाशिक महापालिकेच्या स्वागत कमानीचे अवजड लोखंडी सांगाडे चोरून नेण्याचा प्रयत्न शिवसेना महानगरप्रमुख प्रविण (बंटी) तिदमे यांच्या सतर्कतेमुळे हाणून पडला. या घटनेमुळे लाखोंच्या महापालिकेच्या मालमत्तेची चोरी रोखण्यात यश आले आहे.

जुने सिडको येथील प्रवेशद्वारावर स्वागत कमान आणि दिशादर्शक फलक उभारण्यासाठी नाशिक महापालिकेने ८० लाख रुपयांची तरतूद केली होती. यासाठी कमानीचे अवजड लोखंडी सांगाडे लेखानगर येथे आणून ठेवण्यात आले होते. परंतु, गेल्या पाच ते सहा वर्षांपासून हे काम प्रलंबित राहिले, आणि सांगाडे तिथेच पडून होते. शुक्रवारी संध्याकाळी काही अज्ञात व्यक्तींनी गॅस कटरच्या सहाय्याने या लोखंडी कमानीचे तुकडे कापून आयशर कंपनीच्या ट्रक क्रमांक MH-46-F-5126 मधून साहित्य चोरून नेण्याचा प्रयत्न केला. 

शिवसेना महानगरप्रमुख प्रविण (बंटी) तिदमे हे त्या परिसरातून जात असताना या प्रकाराची त्यांना माहिती मिळाली. त्यांनी तातडीने या प्रकाराचा विरोध केला व चोरट्यांची व्हिडीओ शूटिंग केली. त्यांच्या कडव्या विरोधामुळे चोरट्यांनी घटनास्थळावरून पळ काढला. या घटनेमुळे नाशिक महापालिकेच्या अधिकाऱ्यांच्या भूमिकेवर प्रश्नचिन्ह निर्माण झाले आहे. एवढी मोठी मालमत्ता चोरून नेण्याचा प्रयत्न सुरू असताना महापालिकेचे अधिकारी दुर्लक्ष करत आहेत का, असा सवाल स्थानिक नागरिकांनी उपस्थित केला आहे.

प्रविण (बंटी) तिदमे यांनी महापालिकेकडे याबाबत तक्रार करण्याची तयारी केली असून चोरट्यांविरुद्ध कठोर कारवाईची मागणी केली आहे. नाशिक महापालिकेने या घटनेची दखल घेत तत्काळ चौकशी करावी आणि जबाबदारांवर योग्य ती कारवाई करावी, अशी मागणी होत आहे. महापालिकेच्या मालकीच्या लाखोंच्या मालमत्तेची सुरक्षा सुनिश्चित करणे ही प्रशासकीय जबाबदारी आहे.

जनता विद्यालयात स्वामी विवेकानंद व राजमाता जिजाऊ जयंती उत्साहात साजरी; विद्यार्थिनींचे क्रीडा क्षेत्रात उल्लेखनीय यश

धनश्री गरकळला राज्यस्तरीय ज्युडो स्पर्धेत तर तेजस्वी मोरेला लोकमत मॅरेथॉनमध्ये सुवर्णपदक! 

 स्वामी विवेकानंद व राजमाता जिजाऊ यांच्या प्रतिमेचे पूजन व दीपप्रज्वलन करताना ज्येष्ठ शिक्षिका एस.डी. शेळके व मुख्याध्यापिका श्रीमती वाय.बी.गायधनी

नाशिक, दि. १३ जानेवारी २०२५ : मराठा विद्या प्रसारक समाज संस्थेच्या जनता विद्यालय गोरेराम लेन येथे ( दि. ११ ) रोजी स्वामी विवेकानंद जयंती तथा राष्ट्रीय युवा दिन आणि राजमाता जिजाऊ जयंती मोठ्या उत्साहात साजरी करण्यात आली. कार्यक्रमाच्या अध्यक्षस्थानी शाळेच्या मुख्याध्यापिका श्रीमती वाय.बी. गायधनी होत्या. व्यासपीठावर ज्येष्ठ शिक्षिका श्रीम.एम.एस.पिंगळे व श्रीम.एस.डी.शेळके होत्या. 

कार्यक्रमाची सुरुवात व्यासपीठावरील मान्यवर व शिक्षकांच्या हस्ते प्रतिमापूजन व दीपप्रज्वलनाने झाली. इयत्ता आठवी क च्या विद्यार्थ्यांनी कार्यक्रमाचे यशस्वी नियोजन केले. कु. उत्कर्षा कापडणे हिने सूत्रसंचलन केले. कु. पूर्वा सूर्यवंशी, कृष्णाली बुटाले, जयेश धुर्जड, प्राची कोठे, सृष्टी परदेशी, मानसी चौधरी, तन्मय भोये या विद्यार्थ्यांनी स्वामी विवेकानंद व राजमाता जिजाऊ यांच्या जीवनकार्यावर प्रेरणादायी भाषणे सादर केली

विशेष उल्लेखनीय बाब म्हणजे शालेय विद्यार्थिनींनी क्रीडा क्षेत्रात मिळवलेले यश. कु. धनश्री गणेश गरकळ हिने पुणे येथे आयोजित ५१ व्या सब ज्युनिअर राज्यस्तरीय व राष्ट्रीय निवड चाचणी स्पर्धेत ४८ किलोखालील गटात ज्युडो खेळप्रकारात नाशिक जिल्ह्यासाठी सुवर्णपदक पटकावले. तिची राष्ट्रीय स्पर्धेसाठी निवडही झाली आहे. तसेच कु. तेजस्वी सचिन मोरे हिने लोकमत महामॅरेथॉनमध्ये ३ किलोमीटर स्पर्धेत सुवर्णपदक मिळवले.

ज्युडो स्पर्धेत सुवर्णपदक मिळवणारी धनश्री गरकळ हिला गुलाबपुष्प देऊन सत्कार करतांना शिक्षिका श्रीम. एस.बी.जाधव ( उजवीकडील )  व लोकमत मॅरेथॉन स्पर्धेत सुवर्णपदक मिळवणारी तेजस्वी मोरे हिचा गुलाबपुष्प देऊन सत्कार करतांना शाळेच्या मुख्याध्यापिका श्रीम‌. वाय.बी. गायधनी ( डावीकडील ) व सर्व शिक्षक वृंद

"राष्ट्रीय स्पर्धेत निवड झाल्याचा मला अभिमान आहे. माझे प्रशिक्षक श्री. योगेश शिंदे, तुषार माळोदे आणि अनिकेत जाधव यांच्या मार्गदर्शनाशिवाय हे यश शक्य झाले नसते. शाळेने दिलेल्या सर्व सुविधा आणि प्रोत्साहनाबद्दल मी कृतज्ञ आहे," अशी प्रतिक्रिया सुवर्णपदक विजेती धनश्री गरकळ हिने व्यक्त केली.

या यशस्वी विद्यार्थिनींचा मुख्याध्यापिका श्रीमती गायधनी यांनी गुलाबपुष्प देऊन सत्कार केला. त्यांच्या वर्गशिक्षिका श्रीमती आर.एस. डेर्ले यांचेही विशेष कौतुक करण्यात आले.

"आमच्या विद्यार्थिनींनी क्रीडा क्षेत्रात मिळवलेले यश हे शालेय शिक्षणाबरोबरच सर्वांगीण विकासाचे द्योतक आहे. स्वामी विवेकानंदांच्या विचारांप्रमाणे शारीरिक व मानसिक विकासावर आमचा विशेष भर असतो," असे मुख्याध्यापिका श्रीमती गायधनी यांनी सांगितले.

 सर्व शिक्षक वृंद विजेते विद्यार्थी व कार्यक्रमाचे आयोजन करणारे विद्यार्थी

कार्यक्रमाच्या समारोपात कु. अनुष्का जाधव हिने आभार प्रदर्शन केले. कार्यक्रमाच्या आयोजनासाठी शालेय सांस्कृतिक विभाग प्रमुख श्रीमती एस.एम. गायखे व ८ वी क च्या वर्गशिक्षिका श्रीमती आर.एस. डेर्ले यांचे मार्गदर्शन लाभले. याप्रसंगी सर्व शिक्षक, विद्यार्थी व शिक्षकेतर कर्मचारी उपस्थित होते.

 घराला लागलेल्या आगीवर वेळेत नियंत्रण: मोठा अनर्थ टळला

नाशिक, ७ जानेवारी २०२५ - काकड बाग, मोरे मळा येथील विकास देवरे यांच्या घरात दि. ४ जानेवारी रोजी देवघरातील दिव्यामुळे लागलेल्या आगीने काही काळ परिसरात भीतीचे वातावरण निर्माण केले. अचानक दुपारी घरातून धूर निघू लागल्याने व आगीचे लोळ दिसू लागल्याने नागरिकांमध्ये घबराट पसरली.  

घरात असलेल्या महिलेला व एका लहान बाळाला स्थानिक नागरिकांच्या सतर्कतेमुळे सुरक्षित बाहेर काढण्यात आले. या प्रसंगी राष्ट्रवादी काँग्रेस पार्टी ओबीसी सेलचे जिल्हाध्यक्ष ॲड. सुरेश आव्हाड यांनी प्रसंगावधान राखत घरातील गॅसची टाकी तातडीने बाहेर काढली, ज्यामुळे मोठा अनर्थ टळला. तत्काळ अग्निशमन विभागाला पाचारण करण्यात आले.  

अग्निशमन विभागाच्या लीडिंग फायरमन एस. जे. कानडे, एस. पी. मेंद्रे, आय. ए. पानसरे, अजय पाटील, आणि दिनेश चारोष्कर यांनी घटनास्थळी दाखल होत स्थानिक नागरिकांच्या मदतीने आगीवर नियंत्रण मिळवले. त्यांच्या तत्परतेमुळे घराला अधिक हानी होण्यापासून व परिसराला धोका निर्माण होण्यापासून रोखण्यात यश आले.  

स्थानिक नागरिकांनी ॲड. सुरेश आव्हाड आणि अग्निशमन विभागाच्या कर्मचाऱ्यांचे तात्काळ मदतीसाठी आभार मानले. वेळेत मिळालेल्या मदतीमुळे मोठा अनर्थ टळल्याचे सर्वांनी एकमुखाने मान्य केले.

HMPV चा भारतात शिरकाव ३ रुग्ण आढळले, नेमकं लक्षणे व उपाय काय ?

 HMPV चा भारतात शिरकाव ३ रुग्ण आढळले, नेमकं लक्षणे व उपाय काय ? 

प्रातिनिधिक छायाचित्रे 

कोरोना महामारीनंतर पाच वर्षांनी, चीनमध्ये ह्युमन मेटापन्यूमोव्हायरस (HMPV) चा उद्रेक झाला आहे. हा व्हायरस श्वसनमार्गे पसरतो आणि त्याची लक्षणे कोविड-19 सारखीच आहेत, ज्यामुळे रुग्णालये आणि स्मशानभूमींमध्ये गर्दी वाढली आहे. 

HMPV म्हणजे काय?

ह्युमन मेटापन्यूमोव्हायरस (HMPV) हा RNA व्हायरस आहे, जो Pneumoviridae कुटुंबातील आहे. तो प्रामुख्याने खोकला आणि शिंकण्याद्वारे पसरतो, तसेच संक्रमित लोकांच्या संपर्कामुळे किंवा दूषित वातावरणामुळेही संसर्ग होऊ शकतो. संसर्गानंतर तीन ते पाच दिवसांत लक्षणे दिसू लागतात. 

लक्षणे:

- सर्दी

- खोकला

- ताप

- नाक चोंदणे

- श्वास घेण्यास त्रास

गंभीर प्रकरणांमध्ये, ब्रॉन्कायटिस आणि न्यूमोनिया होऊ शकतात. लहान मुले, वृद्ध, आणि कमकुवत प्रतिकारशक्ती असलेले लोक या संसर्गाला अधिक संवेदनशील असतात. 

सध्याची परिस्थिती:

चीनमधील अनेक शहरांमध्ये HMPV चा प्रादुर्भाव वाढत आहे, ज्यामुळे रुग्णालये आणि स्मशानभूमींमध्ये गर्दी झाली आहे. सोशल मीडियावर व्हायरल झालेल्या फोटो आणि व्हिडिओंमध्ये रुग्णालयांमध्ये मोठी गर्दी दिसत आहे. 

प्रतिबंध आणि उपाय:

- फेस मास्क घालणे

- वारंवार हात स्वच्छ धुणे

- सामाजिक अंतर पाळणे

- गर्दीच्या ठिकाणी जाणे टाळणे

सध्या, HMPV साठी कोणतीही लस उपलब्ध नाही. आरोग्य अधिकाऱ्यांनी परिस्थितीवर लक्ष ठेवले आहे आणि नागरिकांना आवश्यक ती खबरदारी घेण्याचा सल्ला दिला आहे. 

भारतासाठी धोका:

सध्याच्या घडीला, भारतात रूग्णांचा शिरकाव झाल्याचे समजते ३ रुग्ण भारतात आढळले असून तथापि, जागतिक प्रवास आणि संपर्कामुळे संसर्गाचा धोका संभवतो. म्हणून, नागरिकांनी आवश्यक ती खबरदारी घेणे आणि आरोग्य विभागाच्या सूचनांचे पालन करणे आवश्यक आहे.

 कृत्रिम बुद्धिमत्ता (AI) म्हणजे काय?

कृत्रिम बुद्धिमत्ता म्हणजे संगणक प्रणाली किंवा मशीनला मानवी बुद्धिमत्तेसारखी कार्ये करण्याची क्षमता मिळवणे. AI सिस्टम्स ज्या गोष्टी करू शकतात, त्यामध्ये शिकणे, समस्या सोडवणे, भाषा समजून घेणे, आणि निर्णय घेणे यांचा समावेश आहे.

जनरेटिव्ह AI म्हणजे काय?

जनरेटिव्ह AI म्हणजे AI सिस्टीम्स जी नविन सामग्री निर्माण करू शकतात, जसे की टेक्स्ट, इमेजेस, म्युझिक, व्हिडिओ, आणि इतर प्रकाराची सामग्री. हे AI मॉडेल्स मोठ्या प्रमाणावर डेटा वापरून नवीन आणि कल्पक सामग्री निर्माण करतात. उदाहरणार्थ, GPT-3 किंवा GPT-4 जे टेक्स्ट जनरेट करतात आणि DALL·E जे इमेज जनरेट करते.

विद्यार्थ्यांच्या जीवनात AI चा उपयोग:

1. शिक्षणासाठी सहाय्य: AI आधारित शिक्षण अनुप्रयोग विद्यार्थ्यांना वेगवेगळ्या विषयांमध्ये सहाय्य करू शकतात. उदाहरणार्थ, AI tutor प्रणाली विद्यार्थ्यांच्या क्षमतांनुसार शिकवण देऊ शकतात.
2. संसाधन व्यवस्थापन: AI विद्यार्थ्यांच्या वेळेचे व्यवस्थापन सुधारू शकतो. शेड्यूल तयार करणे, प्राधान्यक्रम ठरवणे आणि कार्यांच्या टास्कसाठी सूचना देणे हे AI द्वारे केले जाऊ शकते.
3. वैयक्तिकृत शिकवण: AI विद्यार्थ्यांच्या शिकण्याच्या पद्धतीच्या विश्लेषणानुसार वैयक्तिकृत शिका प्रणाली तयार करू शकतो.
4. भविष्यवाणी आणि मूल्यांकन: AI विद्यार्थ्यांच्या कामावर आधारित त्यांच्या शैक्षणिक प्रगतीची भविष्यवाणी करू शकतो, ज्यामुळे शिक्षकांना त्यांच्या शिकवणी पद्धती सुधारण्यास मदत होते.

करिअर संधी आणि नोकरीच्या संधी:

AI क्षेत्रातील करिअर संधी आणि नोकरीच्या विविध संधी आहेत:

1. AI सॉफ्टवेअर डेव्हलपर: AI सिस्टिम्स तयार करण्याचे काम करणारे डेव्हलपर्स.
2. डेटा सायंटिस्ट: डेटा विश्लेषण आणि AI च्या मदतीने भविष्यवाणी करणे.
3. मशीन लर्निंग इंजिनियर: मशीन लर्निंग अल्गोरिदम आणि मॉडेल्स तयार करणारे अभियंते.
4. AI रिसर्चर: AI मध्ये नविन शोध घेणारे संशोधक.
5. रोबोटिक्स इंजिनियर: AI वापरून स्मार्ट रोबोट तयार करणारे अभियंते.
6. AI ट्रेन्सेटर किंवा ट्रेनर: AI सिस्टीम्सला विशिष्ट कार्ये शिकवणारे लोक.
7. नॅचरल लँग्वेज प्रोसेसिंग (NLP) विशेषज्ञ: मशीनला मानवी भाषा समजून देण्याचे काम करणारे तज्ञ.
8. विज्युअल AI/कंप्युटर व्हिजन विशेषज्ञ: चित्र आणि व्हिडिओवरील विश्लेषणासाठी AI प्रणाली तयार करणारे लोक.

AI च्या भविष्यातील संधी:

1. आरोग्य सेवांमध्ये सुधारणा: AI च्या मदतीने डॉक्टरांना रोगांची अधिक अचूक निदान करण्यात मदत होईल.
2. वित्त क्षेत्रात बदल: AI बँकिंग, इन्शुरन्स, आणि गुंतवणूक व्यवस्थापनासाठी वापरले जाऊ शकते.
3. वाहन उद्योग: स्वयंचलित (ऑटोनोमस) वाहने तयार करणे.
4. शेती क्षेत्र: कृषी क्षेत्रातील उत्पादन वाढवण्यासाठी AI चा वापर.
5. सुरक्षा: AI चे वापर सुरक्षा व्यवस्थापन, सायबर सुरक्षा यासाठी होईल.

विद्यार्थ्यांसाठी शिफारशी:

1. AI शिकायला प्रारंभ करा: विद्यार्थ्यांना AI आणि मशीन लर्निंगचे मूलभूत ज्ञान शिकायला हवे. ऑनलाइन कोर्स, कार्यशाळा, आणि वेबिनार हे सर्वोत्तम पर्याय असू शकतात.
2. कोडिंग शिकणे: Python, R आणि Java सारख्या प्रोग्रॅमिंग भाषांमध्ये शिकावं, कारण हे AI सिस्टीम्स आणि अल्गोरिदम्समध्ये वापरले जातात.
3. प्रोजेक्ट आधारित शिकवण: प्रकल्पांवर काम करून AI संबंधित व्यावहारिक अनुभव मिळवा.

निष्कर्ष:

AI आणि जनरेटिव्ह AI हे भविष्यातील तंत्रज्ञानाच्या क्षेत्रातील सर्वात महत्वाचे घटक बनले आहेत. विद्यार्थ्यांसाठी हे तंत्रज्ञान शैक्षणिक क्षेत्रात, करिअर संधीमध्ये आणि व्यक्तिगत जीवनात मोठे फायदे घेऊन येते. AI साठी कौशल्ये प्राप्त करणे आणि या क्षेत्रात करिअर तयार करणे विद्यार्थ्यांसाठी उत्तम संधी ठरू शकते.

 बालशिक्षण मंदिर गोरेरामलेन विद्यालयातील विद्यार्थ्यांचा राज्यस्तरीय वक्तृत्व स्पर्धेत दणदणीत विजय

नाशिक : मराठा विद्या प्रसारक समाज संचलित बालशिक्षण मंदिर गोरेरामलेन विद्यालयातील होतकरू विद्यार्थ्यांनी त्र्यंबकेश्वर येथे झालेल्या राज्यस्तरीय वक्तृत्व स्पर्धेत आपल्या प्रतिभेचा ठसा उमटवला. युवा स्फूर्ती संघ बेझे यांच्या आयोजनाखाली पार पडलेल्या या स्पर्धेत शाळेच्या विद्यार्थ्यांनी तब्बल पाच पारितोषिके पटकावून शाळेचे नाव राज्यभर गाजवले.

स्पर्धेत इयत्ता सातवीची विद्यार्थिनी इच्छा चव्हाण हिने आपल्या प्रभावी वक्तृत्वाने सर्वांचे लक्ष वेधून घेत सुवर्णपदक आणि सात हजार रुपयांचे रोख पारितोषिक मिळवले. तर इयत्ता पाचवीचा स्वरूप बळावकर याने रजतपदकासह पाच हजार रुपयांचे रोख बक्षीस पटकावले. कनिष्ठ गटातील या यशाने शाळेच्या वक्तृत्व परंपरेला उजाळा मिळाला आहे.

इयत्ता सातवीची ईश्वरी भालेकर हिने कांस्यपदक आणि तीन हजार रुपयांचे रोख पारितोषिक मिळवले. तिच्याच वर्गातील समीक्षा वराडेने उत्तेजनार्थ बक्षिसासह एक हजार रुपयांचे रोख पारितोषिक मिळवले, तर इयत्ता सहावीचा सहास खैरनार याला विशेष पारितोषिक म्हणून पाचशे रुपये रोख बक्षीस मिळाले. सर्व विजेत्यांना प्रतिष्ठेच्या ट्रॉफी आणि प्रशस्तिपत्रांनीही गौरवण्यात आले.

"आजच्या स्पर्धात्मक युगात केवळ अभ्यासातील प्राविण्य पुरेसे नाही, तर विद्यार्थ्यांमध्ये वक्तृत्व कौशल्य असणे अत्यंत महत्त्वाचे आहे. त्यादृष्टीने शाळा सातत्याने प्रयत्नशील असते," असे मत शाळेचे मुख्याध्यापक श्री. के.के. तांदळे यांनी व्यक्त केले. विद्यार्थ्यांच्या या यशामुळे संपूर्ण शालेय परिवार आनंदित असून, येत्या काळात अशीच कामगिरी करण्याचा संकल्प विद्यार्थ्यांनी व्यक्त केला आहे.

बालशिक्षण मंदिर गोरेरामलेन विद्यालयाने गेल्या अनेक वर्षांपासून विद्यार्थ्यांच्या सर्वांगीण विकासावर भर दिला असून, या यशाने शाळेची शैक्षणिक व सहशालेय क्षेत्रातील वाटचाल अधिक बळकट झाली आहे. राज्यस्तरीय स्पर्धेतील हे यश इतर विद्यार्थांसाठी प्रेरणादायी ठरणार आहे.