मौजे सुकेणे महाविद्यालयात गांधीजी व शास्त्रीजींची जयंती साजरी

 रासेयोच्या माध्यमातून विशेष स्वच्छता मोहीम

 मौजे सुकेने कनिष्ठ महाविद्यालयात महात्मा गांधीजी व लालबहादूर शास्त्री यांच्या जयंती निमित्ताने प्रतिमा पूजन प्रसंगी प्राचार्य रायभान दवंगे, प्रा राजेंद्र धनवटे ,प्रा दिनकर रसाळ व आदी

कसबे सुकेणे प्रतिनिधी ता २- मौजे सुकेणे ता निफाड येथील के आर टी ज्यु कॉलेज कनिष्ठ महाविद्यालयात राष्ट्रपिता महात्मा गांधी यांच्या जयंतीनिमित्त भारत सरकारच्या 'स्वच्छता हीच सेवा' हा उपक्रम महाविद्यालयाचे प्राचार्य रायभान दवंगे यांच्या मार्गदर्शनाखाली राबविण्यात आला या उपक्रमामध्ये महाविद्यालयाचा सर्व स्टाफ, विद्यार्थी तसेच, राष्ट्रीय सेवा योजनेचे स्वयंसेवक, सहभागी होऊन त्यांनीही एक 'तास स्वच्छता मोहीम 'राबवून स्वच्छतेचा संदेश दिला. याप्रसंगी प्राचार्य दवंगे यांनी एन एस एस +2 स्तर जिल्हा समन्वयक प्रा राजेंद्र धनवटे, राष्ट्रीय सेवा योजनेचे कार्यक्रम अधिकारी प्रा दिनकर रसाळ, सर्व प्राध्यापक व शिक्षकेतर कर्मचारी यांनीही या उपक्रमामध्ये सहभागी होऊन 'स्वच्छता हीच सेवा' हा संदेश दिला कार्यक्रमाची सुरुवात राष्ट्रपिता महात्मा गांधी आणि लालबहादूर शास्त्री यांच्या प्रतिमेचे पूजन करण्यात आले अध्यक्षस्थानी प्राचार्य दवंगे होते प्रास्ताविक रासेयोचे कार्यक्रमाधिकारी प्रा दिनकर रसाळ यांनी केले. यावेळी सर्वांना स्वच्छतेची शपथ देण्यात आली या कार्यक्रमाप्रसंगी प्रमुख मार्गदर्शक प्रा धनवटे यांनी राष्ट्रपिता महात्मा गांधी व देशाचे दिवंगत पंतप्रधान लालबहादूर शास्त्री यांचा जन्मदिन एकाच दिवशी येणे हा दुग्धशर्करा योग आहे. महात्मा गांधी यांचा देश बलवान करण्यासाठी खेडी बलवान करणे तसेच लालबहादूर शास्त्री यांचा जय जवान जय किसान या संदेशाची अंमलबजावणी झाली तरच देश जागतिक सत्ता म्हणून निश्चित पुढे येईल असा विश्वास व्यक्त केला. अध्यक्षीय मनोगतातून प्राचार्य दवंगे यांनी महात्मा गांधी व लालबहादूर शास्त्री यांच्या जयंतीनिमित्ताने भारत सरकारच्या 'स्वच्छता हीच सेवा' या उपक्रमा अंतर्गत राबविण्यात आलेल्या स्वच्छता मोहिमेत सर्वांनी सक्रिय सहभाग घेतल्याचे सांगून स्वच्छतेचे महत्व विशद केले. तसेच प्रत्येकाने स्वच्छतेचे व्रत अंगीकारून आपल्या आजूबाजूचा परिसर, महाविद्यालय, गाव, समाज व राष्ट्राची स्वच्छता ठेवण्यात आपला हातभार लावावा असा संदेश दिला सूत्रसंचालन रासेयो कार्यक्रमाधिकारी प्रा रसाळ यांनी केले. तर आभार मुकुंद ताकाटे यांनी मानले कार्यक्रमाप्रसंगी राष्ट्रीय सेवा योजनेचे स्वयंसेवक, विद्यार्थी मोठ्या संख्येने उपस्थित होते.

 गीताई कन्या विद्यालयात गांधीजी व शास्त्रीजींच्या जयंतीनिमित्ताने स्वच्छता अभियान

गीताई कन्या वाघ भा नगर विद्यालयात महात्मा गांधीजी व लालबहादूर शास्त्री यांच्या प्रतिमापूजन प्रसंगी मुख्याध्यापिका उज्वला तासकर, शिक्षक व विद्यार्थी

कसबे सुकेणे प्रतिनिधी ता २- के के वाघ शिक्षण संस्था संचलित गीताई वाघ कन्या विद्यालयात स्वच्छता ही सेवा या अंतर्गत व राष्ट्रपिता महात्मा गांधीजी व लालबहादूर शास्त्री यांच्या जयंतीनिमित्ताने स्वच्छता अभियान राबविण्यात आले यावेळी संस्थेच्या विश्वस्त शकुंतला वाघ,अजिंक्य वाघ व मुख्याध्यापिका उज्वला तासकर यांच्या प्रमुख उपस्थितीत रॅलीचे आयोजन करण्यात आले सुरुवातीला राष्ट्रपिता महात्मा गांधी व लालबहादूर शास्त्री यांची जयंती निमित्ताने प्रतिमा पूजन करण्यात आले भारतीय स्वातंत्र्यलढ्याचे पान सुवर्ण अक्षरांनी लिहिणाऱ्या राष्ट्रपिता महात्मा गांधी आणि लालबहादूर शास्त्री यांच्या जीवनावर विद्यार्थिनींनी आपल्या भाषणातून प्रकाश झोत टाकला सूत्रसंचालन कु अश्विनी शिंदे व कु श्रावणी शिंदे यांनी तर प्रास्ताविक कु सोनल सूर्यवंशी हिने केले यावेळी शिक्षक श्री सोनवणे व मुख्याध्यापिका उज्वला तासकर यांनी गांधीजी व शास्त्रीजींच्या जीवन कार्याची ओळख करून दिली आभार कु माधुरी मोरे हिने मानले कार्यक्रमाच्या यशस्वीतेसाठी नववी अ च्या विद्यार्थिनी व वर्गशिक्षिका श्रीम ननवरे यांनी विशेष प्रयत्न केले यावेळी संपूर्ण परिसराची स्वच्छता करण्यात आली कार्यक्रमासाठी सर्व शिक्षक, शिक्षकेतर कर्मचारी व विद्यार्थी उपस्थित होते

 

 सुंदर महाराष्ट्राच्या दिशेने ठोस पाऊल - मुख्यमंत्री एकनाथ शिंदे

राज्यात “एक तारीख एक तास” मोहिमेला अभूतपूर्व प्रतिसाद

मुंबई, दि.१ : आज गिरगाव चौपाटी येथे सागराच्या साक्षीने सुंदर महाराष्ट्राच्या दिशेने एक पाऊल टाकण्यात आले. उत्साही नागरिक, विद्यार्थी यांच्या जोडीने, राज्यपाल रमेश बैस, मुख्यमंत्री एकनाथ शिंदे आणि मान्यवरांनी स्वत: हातात झाडू घेऊन श्रमदान केले आणि स्वच्छतेसाठी 'एक तारीख, एक तास' या राज्यस्तरीय मोहिमेची सुरुवात केली. सुंदर महाराष्ट्र, सुंदर भारत बनविण्यासाठी आपण टाकलेलं हे मोठं पाऊल असून पंतप्रधान नरेंद्र मोदी यांच्यामुळे आज स्वच्छतेची ही लोक चळवळ झाली आहे असे यावेळी मुख्यमंत्री एकनाथ शिंदे माध्यमांशी बोलतांना म्हणाले. राज्यात शहरी आणि ग्रामीण मिळून ७२ हजारापेक्षा जास्त ठिकाणी स्वच्छतेची ही मोहीम पार पडली असून त्याबद्धल मुख्यमंत्र्यांनी कौतूक केले.

उद्या (२ ऑक्टो.) रोजी महात्मा गांधी यांच्या जयंतीनिमित्त आज राज्यभर नागरिकांच्या श्रमदानाने स्वच्छता मोहीम राबविण्यात येत आहे. नगरविकास विभागाच्या वतीने या मोहिमेचे आयोजन करण्यात आले. गिरगाव चौपाटी येथे शुभारंभासाठी पालकमंत्री दीपक केसरकर, मुख्य सचिव मनोज सौनिक, बृहन्मुंबई महानगरपालिका आयुक्त तथा प्रशासक डॉ इक्बाल सिंह चहल, नगर विकास विभागाचे प्रधान सचिव के एच गोविंद राज, ज्येष्ठ क्रिकेटपटू दिलीप वेंगसरकर, इस्रायलचे कौन्सिल जनरल श्री कोबी, कोस्टगार्ड महासंचालक कैलाश नेगी,अभिनेते नील नितीन मुकेश, पद्मिनी कोल्हापुरे, जुही चावला, सुबोध भावे आदींची उपस्थिती होती.

या ऐतिहासिक मोहिमेत सर्वांनी घेतलेल्या उत्स्फूर्त सहभागासाठी धन्यवाद देतांना मुख्यमंत्री म्हणाले की, पंतप्रधानांनी जेव्हा पहिल्यांदा लाल किल्ल्यावरून स्वच्छ भारताची घोषणा केली आणि स्वत: झाडू घेऊन रस्त्यावर उतरले तेव्हा अनेकांनी त्यावर टीका केली आणि खिल्ली उडविण्याचा प्रयत्न केला; पण सगळी जनता जेव्हा या अभियानात उतरली आणि जो इतिहास त्यानंतर रचला तो सगळ्या जगाने पाहिला आणि टीकाकारांची तोंडं बंद झाली. पंतप्रधान म्हणतात त्याप्रमाणे, स्वच्छता हा काही केवळ एक दिवस आणि कुणीतरी एकानेच राबविण्याचा कार्यक्रम नाही, तर ती नेहमीसाठीची आपली जीवनशैली असली पाहिजे.

 स्वच्छता कागदावर नको 

स्वच्छता हीच सेवा हे अभियान महत्त्वाचं आहे. ते कागदावर ठेवू नका. प्रत्यक्ष फिल्डवर काम दिसलं पाहिजे. आजचा दिवस झाला की संपलं, असं नाही. आज स्वच्छता आणि उद्या कचरा असं होता कामा नये. असेही मुख्यमंत्री म्हणाले. स्वच्छतेत महाराष्ट्राला देशात अव्वल स्थान मिळवून देऊया, असे आवाहन मुख्यमंत्री एकनाथ शिंदे यांनी याप्रसंगी केले.

गड,किल्ले, मंदिर परिसरात स्वच्छता

राज्यातल्या गडकिल्ले, धार्मिक स्थळे,मंदिरे यांच्या परिसरात देखील स्वच्छता असली पाहिजे.ही तीर्थक्षेत्रे सुंदर दिसली पाहिजेत यासाठी देखील सर्वांनी सहभागी होऊन काम केले पाहिजे असेही मुख्यमंत्री म्हणाले.

पंतप्रधान नरेंद्र मोदी यांच्यामुळे जगात भारताचा डंका वाजत आहे असे सांगून मुख्यमंत्री म्हणाले की, जे पन्नास साठ वर्षात जमले नाही ते पंतप्रधानांनी गेल्या आठ नऊ वर्षांत केले आणि देशात स्वच्छतेचे काम झाले, भ्रष्ट्राचाराची सफाई झाली. 

 

चौपाटीवर नागरिकांचा उत्साह

गिरगाव चौपाटीवर येताच मुख्यमंत्री एकनाथ शिंदे प्रथम ग्रीनलॉन्स स्कूलच्या छोट्या विद्यार्थ्यांमध्ये मिसळले. हे विद्यार्थी स्वच्छतेच्या मोहिमेत सहभागी होण्यासाठी आपल्या शिक्षकांच्या बरोबर आले होते. मुख्यमंत्र्यांनी सगळ्यांबरोबर हस्तांदोलन केले आणि त्यांचे कौतुक केले. जोगेश्वरीच्या मर्कझ उल मारिफ एज्युकेशन अँड रिसर्च सेंटरचे विद्यार्थी सुद्धा स्वच्छतेसाठी गिरगाव चौपाटीवर आले होते. मुख्यमंत्री त्यांच्याशी देखील बोलले. आज चौपाटी येथे स्वच्छता स्वयंसेवकांच्या जोडीने अनेक संस्था देखील उतरल्या होत्या.स्टेट बँक ऑफ इंडियाचे व्यवस्थापकीय संचालक आलोक कुमार स्वत: त्यांच्या कर्मचाऱ्यांसह आले होते. याशिवाय नानासाहेब धर्माधिकारी प्रतिष्ठान, एनसीसी, गुरुनानक हायस्कूल,नवनीत कॉलेज, सागरी सीमा मंच, उत्कल सेवा समिती, नैशनलं हौसिंग बँक, सेंट झेव्हियर्स कॉलेज तसेच पोलीस, होमगार्ड्स, महानगरपलिका कर्मचारी यांनी उत्साहाने या मोहिमेत भाग घेतला. यावेळी स्वच्छ महाराष्ट्र- स्वच्छ भारताच्या घोषणा देण्यात येत होत्या.  

प्रारंभी 'जय जय महाराष्ट्र, माझा राज्य' गीताने गिरगाव चौपाटीवर कार्यक्रमास सुरुवात झाली.यावेळी स्वच्छतेची प्रार्थना देखील घेण्यात आली.

 मौजे सुकेणे विद्यालयात कर्मवीर ॲड हांडे यांना अभिवादन 

 मौजे सुकेणे ता निफाड विद्यालयात मविप्र संस्थेचे माजी सभापती कर्म ॲड विठ्ठलराव हांडे यांच्या जयंती निमित्ताने त्यांना अभिवादन करताना प्राचार्य रायबान दवंगे, उपमुख्याध्यापक अनिल परदेशी व आदी

कसबे सुकेणे प्रतिनिधी ता १- मौजे सुकेणे ता निफाड येथील कर्म रावसाहेब थोरात हायस्कूल व ज्यु कॉलेज विद्यालयात संस्थेचे माजी सभापती खासदार ॲड विठ्ठलराव हांडे यांच्या जयंतीनिमित्ताने त्यांना अभिवादन करण्यात आले कार्यक्रमाचे अध्यक्षस्थानी प्राचार्य रायभान दवंगे होते सुरुवातीला प्राचार्य दवंगे, उपमुख्याध्यापक अनिल परदेशी,पर्यवेक्षिका संगीता सोनवणे,सायन्स विभाग प्रमुख प्रा शुभांगी गांगुर्डे आदींच्या हस्ते कर्मवीर ॲड विठ्ठलराव हांडे यांच्या प्रतिमेचे पूजन करण्यात आले याप्रसंगी विद्यार्थिनी कु स्नेहल शेवाळे व प्राचार्य रायभान दवंगे यांनी कर्मवीर ॲड विठ्ठलराव हांडे यांच्या कार्याचा आढावा घेत मविप्र संस्थेसाठी दिलेल्या योगदानाची माहिती दिली सूत्रसंचालन सहावी ब ची विद्यार्थिनी कु श्रेया सानप व कु तेजस्वी गुरगुडे हिने तर आभार कु सौरभ वाघचौरे यांनी मानले कार्यक्रमासाठी सर्व शिक्षक, शिक्षकेतर कर्मचारी व विद्यार्थी उपस्थित होते.

 

 दुःखितांच्या वास्तव वेदना व्यक्त करणे म्हणजे प्रगतिशीलता होय - साहित्यिक बी.जी. वाघ

नाशिक :- "शोषित- वंचित समाजाचा आवाज प्रगतिशील साहित्यातून प्रकट झाला आहे. दुःखितांच्या वास्तव वेदना व्यक्त करणे म्हणजे प्रगतिशीलता होय." असे प्रतिपादन साहित्यिक बी.जी.वाघ यांनी केले. तिसऱ्या नाशिक जिल्हा प्रगतिशील साहित्य संमेलन अध्यक्ष तुकाराम चौधरी व स्वागताध्यक्ष कॉम्रेड राजू देसले यांच्या सत्काराचे आयोजन वडाळा नाशिक येथे करण्यात आले होते. त्यावेळी ते बोलत होते. प्रगतिशील लेखक संघाच्या ८ आक्टो. 23 रोजी नाशिक येथे होणाऱ्या तिसऱ्या एकदिवशीय साहित्य संमेलनाच्या अध्यक्षपदी आणि स्वागताध्यक्ष यांची निवड झाल्याबद्दल न्यू उम्मीद जनजीवन बहुउद्देशीय संस्था नाशिक, शाहू महाराज स्मृती शताब्दी समिती नाशिक, एम्स चॅरिटेबल ट्रस्ट,नासिक जिल्हा इतिहास संशोधक संस्था व संविधान प्रेमी नाशिककर यांच्या वतीने 

न्यू उम्मीद संस्था आलिशान सोसायटी वडाळा गाव नाशिक येथे सत्कार संपन्न. सदर सत्कार समारंभाचे अध्यक्ष छत्रपती शाहू जन्मशताब्दी समितीचे अध्यक्ष जयवंत खडताळे हे होते.

सुप्रसिद्ध साहित्यिक तथा माजी सनदी अधिकारी बी.जी. वाघ यांच्या हस्ते सत्कार करण्यात आला. पुढे बोलताना वाघ असे म्हणाले की, 'स्वातंत्र्यपूर्व काळापासून प्रगतिशील लेखक संघ हा संविधान मूल्यांच्या बाजूने उभा आहे. ही चळवळ अतिशय जोमाने पुढे नेण्याची आज गरज आहे.'

यावेळी ज्येष्ठ पँथर नेते करूणासागर पगारे प्रमुख पाहुणे म्हणून उपस्थित होते. त्यांनी ग्रामीण भागात त्याचबरोबर शहराच्या स्लम एरियांमध्ये जाऊन ही चळवळ रुजवण्यासाठी प्रगतिशील लेखक संघ काम करत असल्याबाबत कौतुक केले . खलील पटेल, तन्जीम खान, मिनाज मिर्झा, हारुण रहेमान शेख व मुकुंद दिक्षित यांची देखील यावेळी भाषणे झाली. आपण प्रगतिशीलता हरवून चाललो आहोत त्यामुळे समाज अधोगतीला लागेल अशी चिंता यावेळेस त्यांनी व्यक्त केली.

    झालेल्या सत्काराला उत्तर देताना अध्यक्ष कादंबरीकार तुकाराम चौधरी यांनी आपल्या लेखनाला या अध्यक्षपदामुळे आणि सत्कारामुळे बळ मिळाले असे भावपूर्ण उद्गार काढले. त्याचबरोबर कॉम्रेड राजू देसले यांनी मी रस्त्यावरील लढाईतला आंदोलनातला कार्यकर्ता आहे परंतु त्याच वेळेस सर्वसामान्य माणसाच्या न्याय हक्कासाठी जे साहित्य लिहिले जाते त्याच्या पूर्ण ताकदीने पाठीशी आहे म्हणूनच मी या उपक्रमात हिरीरीने भाग घेतो आहे, ८ऑक्टोबर रोजी होणाऱ्या साहित्य संमेलन मध्ये वि एन नाईक कॉलेज नाशिक तेथे मोठ्या संख्येने सहभागी व्हावे असे प्रतिपादन केले.

या सत्कार सोहळ्यासाठी प्रगतिशील लेखक संजय संघाचे राष्ट्रीय सचिव राकेश वानखेडे, जिल्हाध्यक्ष प्रमोद अहिरे जिल्हा सचिव प्रल्हाद पवार, संविधान सन्मान अभियानाचे शिवदास म्हसदे संविधान प्रेमी नाशिककरचे किरण मोहिते आदि प्रमुख पाहुणे म्हणून उपस्थित होते.

कार्यक्रम यशस्वीतेसाठी खलील पटेल, 

तन्जीम खान, मिनाज मिर्झा,अजमल खान, ॲड कृष्णा शिलवार, प्रभाकर धात्रक, तबरेश शेख, ॲड. वासिम खान, प्रा.डॉ. यशवंत साळुंखे , डॉ. श्रीहरी थोरवत, डॉ रामदास भौंग, डॉ शरद नागरे, मनोहर पगारे, शिवदास म्हासदे यांनी परिश्रम घेतले..

 शेतमजूर एकजूट बळकट करा - कॉ. राजू देसले

 नाशिक:  शेतमजुरांचे प्रश्न तीव्र होत आहेत, महागाई,  बेरोजगारी वाढत आहे, केंद्र व राज्य सरकार रेशन वेवस्था मोडकळीस आणण्यासाठी प्रयत्न करत आहे, रोजगार हमी योजना चा प्रभावी अंमलबजावणी व्हावी, शेतकऱ्याच्या  बांधावरील कामाचा समावेश मनरेगा मध्ये करावा व मजुरांना  रोजगार उपलब्ध व्हावा यासाठी  शेतमजुर एकजूट करुन तीव्र लढा उभारावा असे आवाहन लाल बावटा शेतमजूर युनियन नाशिक जिल्हा अधिवेशनात  भारतीय कम्युनिस्ट पक्ष राज्य सहसचिव कॉ.राजू देसले यांनी   उद्घाटन प्रसंगी मनोगत व्यक्त करताना आयटक कामगार केंद्र नाशिक येथे केलें.

नाशिक जिल्ह्या  राज्य लाल बावटा शेतमजूर युनियन  अधिवेशन   भारतीय कम्युनिस्ट पक्ष राज्य सहसचिव कॉ राजु देसले यांनी विविध शेतमजूरांच्या समस्यांवर मार्गदर्शन केले. भाकपाचे जिल्हा सचिव कॉम्रेड महादेव खुडे हे अध्यक्ष स्थानी  होते प्रसंगी कॉ.मनोहर पगारे,कॉ.सुकदेव केदारे , कॉ रमेश पवार , किसान सभेचे कॉ नामदेवराव बोराडे, कॉ भिमा पाटील,  अनिल पठारे,योगिता भाबड, ऊषा भालेराव, शिवाजी पगारे,रंजना बाई जाधव, सीमा वाघ, जयवांताबाई नवरे आदी सदस्य जिल्हातील सटाणा,सिन्नर, चांदवड,नांदगाव तालुक्यातून उपस्थीत होते.  संभाजीनगर तेथे ६,७,८ ऑक्टोबर राज्य अधिवेशन साठी ९  प्रतिनिधि निवड करण्यात आली.  अधिवेशनात खालील ठराव संमत करण्यात आले.

 १) शेतमजूर साठी सामाजिक सुरक्षा लागू करा. त्यासाठी सामाजिक सुरक्षा मंडळ स्थापन करा.

२)  मनरेगा मध्ये मजुरांना मजुरी ६००रू. प्रतीदीन दया,  वर्ष भरात मानसी ३००दिवस काम द्या.

३)   रेशन वेवस्था मजबुत करा. रोख सबसिडी नको. धान्य दया.

 ४) महागाई कमी करा.

 ५) कसत असलेल्या

 गायराण जमीन, वन जमीन नावावर करा.

 आदि ठराव संमत करण्यात आले.

 

 'एक तारीख - एक तास' स्वच्छता उपक्रमात महाराष्ट्राला अव्वल आणूया! 

मुख्यमंत्री एकनाथ शिंदे यांचे आवाहन

मुंबई, दि. २९ : - स्वच्छतेसाठी 'एक तारीख, एक तास' या रविवारी १ ऑक्टोबर रोजी राबवण्यात येणाऱ्या उपक्रमात उत्स्फूर्तपणे सहभागी होऊन महाराष्ट्राला देशात अव्वल स्थान मिळवून देऊया, असे आवाहन मुख्यमंत्री एकनाथ शिंदे यांनी केले आहे.

'स्वच्छता पंधरवडा- स्वच्छता ही सेवा” या अभियानांतर्गत राष्ट्रपिता महात्मा गांधी यांच्या जयंतीच्या आदल्या दिवशी रविवारी १ ऑक्टोबर रोजी राज्यात सर्वत्र नागरी तसेच ग्रामीण भागात 'एक तारीख- एक तास' या उपक्रमांतर्गत प्रत्येकाला ते जिथे कुठे असतील तिथे स्वच्छता, साफ-सफाई करून या अभियानात सहभाग नोंदवू शकणार आहेत. गावा-गावांमध्ये, शहरात, प्रत्येक वार्डात सकाळी १० वाजेपासून या मोहिमेची सुरवात होईल. यात सफाई मित्र ही सहभागी होतील. काही ठिकाणी स्वच्छतेचे महत्व पटवून देणारी विशेष शिबिरे-प्रदर्शने आयोजित केली जातील. ज्यातून स्वच्छतेची गरज, त्यांचे फायदे, महत्व पटवून दिले जाईल.

याबाबतच्या आवाहनात मुख्यमंत्री श्री. शिंदे यांनी म्हटले आहे की, स्वच्छता आपल्या सर्वाच्या दैनंदिनीतील महत्वाची गोष्ट आहे. स्वच्छता आपल्या आयुष्यात समृद्धी आणते. आरोग्य आणि परिसराची स्वच्छता यांचा दृढ संबंध आहे. राष्ट्रपिता महात्मा गांधी यांच्यापासून ते अनेक थोर राष्ट्र पुरूष साधू-संतानीही स्वच्छतेबाबत आपल्याला धडे घालून दिले आहेत. याच अनुषंगाने आपल्या सर्वांना 'स्वच्छता पंधरवडा-स्वच्छता ही सेवा' हे अभियान यशस्वी करायचं आहे. 'एक तारीख एक तास' या उपक्रमाला स्वच्छता लोकचळवळीचे रूप द्यायचे आहे. त्यासाठी प्रत्येकाला आपला एक तास तास स्वच्छतेसाठी द्यायचा आहे. आपण, आपले कुटुंबिय किंवा सहकारी जिथे कुठे असाल, तिथे आपण स्वच्छता मोहिम राबवून या अभियानात योगदान द्यायचे आहे, असे आवाहन मुख्यमंत्र्यांनी केले आहे. 

प्रधानमंत्री नरेंद्र मोदी यांनी वर्षभरापूर्वी आपल्या राज्यात स्वच्छ महाराष्ट्र नागरी अभियान-२ चा शुभारंभ केला. त्यातून महाराष्ट्र कचरामुक्त आणि स्वच्छ असावा असे ध्येय घेऊन आता वाटचाल करत असल्याचे नमूद करून मुख्यमंत्र्यांनी म्हटले आहे की, “महाराष्ट्राला अनेक थोरा-मोठ्यांनी परिसर स्वच्छता आणि आरोग्यदायी सवयीचा मंत्र दिला आहे. संत गाडगेबाबांनी हाती झाडू घेऊन स्वच्छतेचे धडे दिले आहेत. आता या धड्यांची आपल्याला उजळणी करायची आहे. आपआपल्या परिसरात महापालिका, नगरपालिका, नगरपंचायत तसेच गावा-गावांमध्ये ग्रामपंचायतींच्या पुढाकारांनी स्वच्छता मोहिम राबवायची आहे. साचलेला कचरा, राडा-रोडा-डेब्रीज हटवायचे आहेत. यात आपल्या सर्वांच्या मदतीसाठी स्थानिक स्वराज्य संस्था, महसूल आणि जिल्हा प्रशासन सज्ज राहील, असेही मुख्यमंत्र्यांनी सांगितले आहे

“स्वच्छता ही सवय आहे. आपल्याला स्वच्छतेची शिस्त अंगिकारायची आहे. त्याला संस्काराचे रूप द्यायचे आहे. या अभियानानंतर आपल्याला १५ डिसेंबर २०२३ पर्यंत मुख्यमंत्री सक्षम शहर स्पर्धा आणि मुख्यमंत्री सक्षम वॉर्ड स्पर्धा ही देखील यशस्वी करायची आहे. हे अभियान शंभर टक्के यशस्वी करून देशात आपल्या महाराष्ट्राला अव्वल स्थान मिळवून द्याल. चला महाराष्ट्र कचरा मुक्त करूया. स्वच्छ, सुंदर करूया. आरोग्य आणि समृद्धीला गवसणी घालूया. स्वच्छतेचा जागर करूया,” असेही मुख्यमंत्र्यानी आवाहन केले आहे